ਪਟਿਆਲਾ, 1 ਅਪ੍ਰੈਲ - ਵਿਜੀਲੈਂਸ ਪਟਿਆਲਾ ਦੀ ਟੀਮ ਨੇ ਵਿਜੀਲੈਂਸ ਅਧਿਕਾਰੀ ਦੇ ਨਾਂ 'ਤੇ ਢਾਈ ਲੱਖ ਰੁਪਏ ਦੀ ਕਥਿਤ ਤੌਰ 'ਤੇ ਰਿਸ਼ਵਤ ਲੈਣ ਵਾਲੇ ਸਾਬਕਾ ਅਕਾਲੀ ਆਗੂ ਨੂੰ ਕਾਬੂ ਕੀਤਾ ਹੈ। ਯੂਥ ਅਕਾਲੀ ਦਲ ਦੇ ਸਾਬਕਾ ਆਗੂ ਸਾਹਿਲ ਗੋਇਲ ਨੂੰ ਉਸ ਦੇ ਸਾਥੀ ਪਰਮਜੀਤ ਸਿੰਘ ਪੰਮਾ ਸਮੇਤ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਕਰੀਬੀ ਰਿਹਾ ਸਾਹਿਲ ਇਸ ਸਮੇਂ ਸ਼ਿਵ ਸੈਨਾ ਪੰਜਾਬ ਦੇ ਪਾਰਟੀ ਇੰਚਾਰਜ ਵਜੋਂ ਕੰਮ ਕਰ ਰਿਹਾ ਸੀ। ਵਿਜੀਲੈਂਸ ਪਟਿਆਲਾ ਦੀ ਟੀਮ ਨੇ ਇਹ ਕਾਰਵਾਈ ਜਗਸੀਰ ਰਾਮ ਦੀ ਸ਼ਿਕਾਇਤ ’ਤੇ ਕੀਤੀ।  ਸ਼ਿਕਾਇਤ ਅਨੁਸਾਰ ਜਗਸੀਰ ਦੀ ਮਾਤਾ ਪੱਪੀ ਦੇਵੀ ਪਿੰਡ ਅਰਨੇਟੂ (ਪਾਤੜਾਂ) ਦੀ ਸਾਬਕਾ ਸਰਪੰਚ ਹੈ। ਸਾਲ 2019 'ਚ ਪਿੰਡ ਲਈ ਜਾਰੀ ਵੱਖ-ਵੱਖ ਸਰਕਾਰੀ ਗ੍ਰਾਂਟਾਂ 'ਚ ਗਬਨ ਕਰਨ ਦੇ ਦੋਸ਼ 'ਚ ਉਸ ਦੀ ਮਾਂ ਖਿਲਾਫ ਦਰਜ ਸ਼ਿਕਾਇਤ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਦੋਵਾਂ ਮੁਲਜ਼ਮਾਂ ਨੇ ਕਿਹਾ ਕਿ ਉਨ੍ਹਾਂ ਨੇ ਐਸਐਸਪੀ ਵਿਜੀਲੈਂਸ ਪਟਿਆਲਾ ਨਾਲ ਗੱਲ ਕੀਤੀ ਹੈ ਅਤੇ ਮੁਲਜ਼ਮ ਸਾਬਕਾ ਸਰਪੰਚ ਦਾ ਬਚਾਅ ਕਰਨਗੇ। ਇਸ ਦੇ ਬਦਲੇ ਉਨ੍ਹਾਂ 2.50 ਲੱਖ ਰੁਪਏ ਲਏ ਸਨ। ਇਸ ਸਬੰਧੀ ਜਗਸੀਰ ਰਾਮ ਨੇ ਵਿਜੀਲੈਂਸ ਦੇ ਆਨਲਾਈਨ ਪੋਰਟਲ 'ਤੇ ਸ਼ਿਕਾਇਤ ਕੀਤੀ ਸੀ। ਐਸਐਸਪੀ ਪਟਿਆਲਾ ਵਿਜੀਲੈਂਸ ਜਗਤਵੀਰ ਸਿੰਘ ਦੀਆਂ ਹਦਾਇਤਾਂ ’ਤੇ ਇੰਸਪੈਕਟਰ ਹਰਸਿਮਰਨਜੀਤ ਸਿੰਘ ਦੀ ਅਗਵਾਈ ਵਿੱਚ ਟੀਮ ਬਣਾ ਕੇ ਅੱਜ ਮੁਲਜ਼ਮਾਂ ਨੂੰ ਕਾਬੂ ਕਰ ਲਿਆ।