ਗੜ੍ਹਸ਼ੰਕਰ 29 ਮਾਰਚ - ਜੰਗਲਾਤ ਵਿਭਾਗ ਅਧੀਨ ਸ਼ਿਵਾਲਿਕ ਪਹਾੜਾਂ ਨੇੜੇ ਜੰਗਲ ਵਿੱਚ ਕੰਮ ਕਰਦੇ ਮਨਰੇਗਾ ਵਰਕਰ ਪਿਛਲੇ ਚਾਰ ਮਹੀਨਿਆਂ ਤੋਂ ਕੀਤੇ ਕੰਮ ਦੀ ਮਜ਼ਦੂਰੀ ਨਾ ਮਿਲਣ ਕਾਰਨ ਪਿੰਡ ਦੇ ਮਜ਼ਦੂਰ ਬੇਹੱਦ ਪ੍ਰੇਸ਼ਾਨ ਹਨ। ਮਨਰੇਗਾ ਵਰਕਰਾਂ ਅਨੁਸਾਰ ਦੇ ਦੱਸਣ ਅਨੁਸਾਰ ਮਜ਼ਦੂਰੀ ਨਾ ਮਿਲਣ ਕਾਰਨ ਉਹ ਆਰਥਿਕ ਤੰਗੀ ਦਾ ਸ਼ਿਕਾਰ ਹੋ ਗਏ ਹਨ ਪਰ ਉਨ੍ਹਾਂ ਦੀ ਕੋਈ ਸੁਣਵਾਈ ਨਹੀਂ ਹੋ ਰਹੀ। ਇਨ੍ਹਾਂ ਮਨਰੇਗਾ ਮਜ਼ਦੂਰਾਂ ਵਿੱਚ ਜ਼ਿਆਦਾਤਰ ਲੋੜਵੰਦ ਪਰਿਵਾਰਾਂ ਦੀਆਂ ਔਰਤਾਂ ਸ਼ਾਮਿਲ ਹਨ।
 ਇਸ ਸਬੰਧੀ ਅੱਜ ਪਿੰਡ ਰਾਮਪੁਰ ਵਿਖੇ ਇਲਾਕੇ ਦੇ ਚਾਰ ਪਿੰਡਾਂ ਦੇ ਮਨਰੇਗਾ ਵਰਕਰਾਂ ਦਾ ਇਕ ਇਕੱਠ ਹੋਇਆ ਜਿਸ ਮੌਕੇ ਵਰਕਰਾਂ ਨੇ ਦੱਸਿਆ ਕਿ ਉਹ ਪਿਛਲੇ ਲੰਮੇਂ ਸਮੇਂ ਤੋਂ ਜੰਗਲਾਤ ਵਿਭਾਗ ਅਧੀਨ ਖੇਤਰ ਦੇ ਨੀਮ ਪਹਾੜੀ ਤੇ ਜੰਗਲੀ ਇਲਾਕੇ ਵਿੱਚ ਜੰਗਲ ਨੂੰ ਸਾਫ ਕਰਨ, ਨਵੇਂ ਪੌਦੇ ਲਾਉਣ ,ਰਸਤਿਆਂ ਦੀ ਸਫਾਈ ਅਤੇ ਹੋਰ ਸਬੰਧਤ ਕੰਮਾਂ ਵਿੱਚ ਲੱਗੇ ਹੋਏ ਹਨ ਪਰ ਪਿਛਲੇ ਚਾਰ ਮਹੀਨਿਆਂ ਤੋਂ ਬਲਾਕ ਵਿਕਾਸ ਅਤੇ ਪੰਚਾਇਤ ਅਫਸਰ ਦੇ ਦਫਤਰ ਵੱਲੋਂ ਉਨਾਂ ਦਾ ਮਿਹਨਤਾਨਾ ਜਾਰੀ ਨਹੀਂ ਕੀਤਾ ਜਾ ਰਿਹਾ ਜਿਸ ਕਰਕੇ ਅਨੇਕਾਂ ਮਨਰੇਗਾ ਵਰਕਰ ਇਸ ਕੰਮ ਨੂੰ ਛੱਡਣ ਲਈ ਮਜਬੂਰ ਹੋ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ 300 ਰੁਪਏ ਦੀ ਦਿਹਾੜੀ ਲਈ ਉਨਾਂ ਨੂੰ ਪਿੰਡ ਰਾਮਪੁਰ, ਬਿਲੜੋ ਸਤਨੌਰ, ਪੱਖੋਵਾਲ ਅਤੇ ਹੋਰ ਪਿੰਡਾਂ ਤੋਂ ਕਿਰਾਏ ਦੇ ਵਾਹਨ ਲੈ ਕੇ ਜੰਗਲ ਵੱਲ ਜਾਣਾ ਪੈਂਦਾ ਹੈ ਅਤੇ ਇਨਾਂ ਵਾਹਨਾਂ ਦਾ ਕਿਰਾਇਆ ਵੀ ਆਪਣੇ ਪੱਲਿਓਂ ਦੇ ਰਹੇ ਹਨ ਪਰ ਉਨ੍ਹਾਂ ਨੂੰ ਮਿਹਨਤਾਨਾ ਨਾ ਮਿਲਣ ਕਰਕੇ ਪਰਿਵਾਰਾਂ ਦੀ ਰੋਜ਼ੀ ਰੋਟੀ ਚਲਾਉਣੀ ਵੀ ਮੁਸ਼ਕਿਲ ਹੋ ਗਈ ਹੈ। ਇਸ ਸਬੰਧੀ ਕੰਢੀ ਸੰਘਰਸ਼ ਕਮੇਟੀ ਦੇ ਅਹੁਦੇਦਾਰ ਦਰਸ਼ਨ ਸਿੰਘ ਮੱਟੂ ਨੇ ਕਿਹਾ ਜੰਗਲ ਵਿੱਚ ਸਾਫ ਸਫਾਈ, ਪੌਦੇ ਲਗਾਉਣ ਅਤੇ ਹੋਰ ਕਈ ਜੋਖ਼ਮ ਭਰੇ ਕੰਮ ਮਨਰੇਗਾ ਵਰਕਰਾਂ ਵੱਲੋਂ ਕੀਤੇ ਜਾ ਰਹੇ ਹਨ ਜਿਸ ਸਬੰਧੀ ਉਨਾਂ ਦੇ ਜੀਵਨ ਦਾ ਬੀਮਾ ਅਤੇ ਸਿਹਤ ਸੁਰੱਖਿਆ ਦੀ ਕਿੱਟ ਵੀ ਉਪਲਬਧ ਹੋਣੀ ਚਾਹੀਦੀ ਹੈ ਪਰ ਇਹ ਸਹੂਲਤਾਂ ਤਾਂ ਇੱਕ ਪਾਸੇ ਮਜ਼ਦੂਰਾਂ ਨੂੰ ਉਨ੍ਹਾਂ ਦਾ ਮਿਹਨਤਾਨਾ ਲੈਣ ਲਈ ਵੀ ਜੱਦੋ ਜਹਿਦ ਕਰਨੀ ਪੈ ਰਹੀ ਹੈ। ਉਨ੍ਹਾਂ ਚੇਤਾਵਨੀ ਦਿੱਤੀ ਕਿ ਮਨਰੇਗਾ ਵਰਕਰਾਂ ਨੂੰ ਸਹੀ ਸਮੇਂ ਤੇ ਮਿਹਨਤਾਨਾ ਜਾਰੀ ਕੀਤਾ ਜਾਵੇ ਅਤੇ ਉਨਾਂ ਨੂੰ ਇਸ ਕੰਮ ਸਬੰਧੀ ਹੋਰ ਸਹੂਲਤਾਂ ਅਤੇ ਭੱਤੇ ਵੀ ਦਿੱਤੇ ਜਾਣ। ਇਸ ਸਬੰਧੀ ਬਲਾਕ ਵਿਕਾਸ ਅਤੇ ਪੰਚਾਇਤ ਅਫਸਰ ਨੀਰੂ ਬਾਲਾ ਨੇ ਕਿਹਾ ਕਿ ਫੰਡ ਰੁਕਣ ਕਾਰਨ ਕਈ ਵਾਰ ਮਿਹਨਤਾਨਾ ਜਾਰੀ ਨਹੀਂ ਹੁੰਦਾ ਅਤੇ ਜਲਦ ਹੀ ਇਸ ਸਬੰਧੀ ਕਾਰਵਾਈ ਕੀਤੀ ਜਾਵੇ।