ਲੁਧਿਆਣਾ, 30 ਜੁਲਾਈ 2024:- ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਵੱਲੋਂ ਭਾਰਤੀ ਖੇਤੀ ਖੋਜ ਪਰਿਸ਼ਦ ਵੱਲੋਂ ਪ੍ਰਾਯੋਜਿਤ ਫਾਰਮਰ ਫਸਟ ਪ੍ਰਾਜੈਕਟ ਤਹਿਤ ਪਿੰਡ ਹਮੀਦੀ ਵਿਖੇ ਡੇਅਰੀ ਪਸ਼ੂਆਂ ਲਈ ਸੂਖਮ ਖਣਿਜਾਂ ਦੀ ਵਰਤੋਂ ਕਰਨ ਸੰਬੰਧੀ ਕੈਂਪ ਲਗਾਇਆ ਗਿਆ। ਸੂਖਮ ਖਣਿਜਾਂ ਵਿੱਚ ਆਇਰਨ, ਮੈਂਗਨੀਜ਼, ਤਾਂਬਾ, ਆਇਓਡੀਨ, ਜ਼ਿੰਕ, ਕੋਬਾਲਟ, ਫਲੋਰਾਈਡ ਅਤੇ ਸੇਲੇਨੀਅਮ ਸ਼ਾਮਲ ਹਨ।
ਇਹ ਪ੍ਰਾਜੈਕਟ ਡਾ. ਪਰਕਾਸ਼ ਸਿੰਘ ਬਰਾੜ, ਨਿਰਦੇਸ਼ਕ ਪਸਾਰ ਸਿੱਖਿਆ ਅਤੇ ਫਾਰਮਰ ਫਸਟ ਪ੍ਰਾਜੈਕਟ ਦੇ ਸਿਰਮੌਰ ਅਧਿਕਾਰੀ ਦੀ ਅਗਵਾਈ ਹੇਠ ਕੰਮ ਕਰ ਰਿਹਾ ਹੈ। ਪ੍ਰਾਜੈਕਟ ਦੇ ਪ੍ਰਮੁੱਖ ਨਿਰੀਖਕ ਡਾ. ਪਰਮਿੰਦਰ ਸਿੰਘ ਨੇ ਡੇਅਰੀ ਜਾਨਵਰਾਂ ਲਈ ਸੂਖਮ ਖਣਿਜਾਂ ਦੀ ਮਹੱਤਤਾ ਬਾਰੇ ਦੱਸਿਆ। ਡਾ. ਰਾਮ ਚੰਦ, ਸਾਬਕਾ ਵਧੀਕ ਮਹਾਂਨਿਰਦੇਸ਼ਕ ਭਾਰਤੀ ਖੇਤੀ ਖੋਜ ਪਰਿਸ਼ਦ ਨੇ ਵੀ ਇਸ ਨਿਵੇਕਲੀ ਪਹੁੰਚ ਵਾਲੇ ਕੈਂਪ ਵਿਚ ਹਿੱਸਾ ਲਿਆ। ਕੈਂਪ ਵਿਚ 25 ਲਾਭਪਾਤਰੀ ਕਿਸਾਨਾਂ ਨੇ ਹਿੱਸਾ ਲਿਆ।
ਡਾ. ਪਰਮਿੰਦਰ ਸਿੰਘ ਨੇ ਲੇਵੇ ਦੀ ਸਿਹਤ ਨੂੰ ਮਜ਼ਬੂਤ ਕਰਨ ਅਤੇ ਸੋਜ ਦੀ ਸੰਭਾਵਨਾ ਨੂੰ ਘਟਾਉਣ ਲਈ ਡੇਅਰੀ ਜਾਨਵਰਾਂ ਦੀ ਪ੍ਰਤੀਰੋਧਕ ਸ਼ਕਤੀ ਨੂੰ ਵਧਾਉਣ ਲਈ ਸੂਖਮ ਖਣਿਜਾਂ ਦੀ ਭੂਮਿਕਾ ਬਾਰੇ ਭਾਸ਼ਣ ਦਿੱਤਾ। ਉਨ੍ਹਾਂ ਨੇ ਦਵਾਈਆਂ ਦੀ ਬੇਲੋੜੀ ਵਰਤੋਂ ਅਤੇ ਜਾਨਵਰ ਦੇ ਇਲਾਜ ਵਿੱਚ ਖਰਚ ਘਟਾਉਣ ਦੇ ਨੁਕਤੇ ਸਾਂਝੇ ਕੀਤੇ। ਉਨ੍ਹਾਂ ਨੇ ਦੁੱਧ ਦੇ ਸ਼ੁੱਧ ਉਤਪਾਦਨ ਅਤੇ ਡੇਅਰੀ ਜਾਨਵਰਾਂ ਦੀ ਵਧੇਰੇ ਉਤਪਾਦਕਤਾ ਨੂੰ ਯਕੀਨੀ ਬਣਾਉਣ ਲਈ ਲੇਵੇ ਦੀ ਸਿਹਤ ਦੀ ਮਹੱਤਤਾ `ਤੇ ਵੀ ਚਾਨਣਾ ਪਾਇਆ। ਡਾ. ਅਮਨਦੀਪ ਸਿੰਘ ਸਹਿ-ਪ੍ਰਮੁੱਖ ਨਿਰੀਖਕ ਨੇ ਕਿਸਾਨਾਂ ਨੂੰ ਪਸ਼ੂ ਪਾਲਣ ਦੇ ਚੰਗੇ ਅਭਿਆਸਾਂ ਜਿਵੇਂ ਕਿ ਫਾਰਮ, ਪਸ਼ੂਆਂ ਅਤੇ ਆਲੇ-ਦੁਆਲੇ ਦੀ ਦੇ ਨਾਲ-ਨਾਲ ਪਸ਼ੂਆਂ ਦੀ ਚੰਗੀ ਸਿਹਤ ਨੂੰ ਯਕੀਨੀ ਬਣਾਉਣ ਲਈ ਜਾਗਰੂਕ ਕੀਤਾ, ਸਾਫ਼-ਸਫ਼ਾਈ ਨਾਲ ਪਸ਼ੂਆਂ ਨੂੰ ਲੇਵੇ ਦੀ ਸੋਜ ਵਰਗੀ ਬੀਮਾਰੀ ਤੋਂ ਬਚਾਇਆ ਜਾ ਸਕਦਾ ਹੈ।
ਡਾ. ਰਾਮ ਚੰਦ ਨੇ ਕਿਸਾਨਾਂ ਨਾਲ ਗੱਲਬਾਤ ਕੀਤੀ ਅਤੇ ਪਸ਼ੂਆਂ ਦੀ ਖੁਰਾਕ ਵਿੱਚ ਸੂਖਮ ਖਣਿਜਾਂ ਨੂੰ ਸ਼ਾਮਲ ਕਰਨ ਬਾਰੇ ਅਤੇ ਨਵੀਆਂ ਵਿਗਿਆਨਕ ਤਕਨਾਲੋਜੀਆਂ ਅਪਨਾਉਣ ਬਾਰੇ ਪ੍ਰੇਰਿਤ ਕੀਤਾ।
ਲਾਭਪਾਤਰੀ ਕਿਸਾਨਾਂ ਨੂੰ ਸੂਖਮ ਖਣਿਜਾਂ ਦੇ ਪੈਕੇਟ ਵੰਡੇ ਗਏ। ਕਿਸਾਨਾਂ ਦਾ ਸਮੁੱਚਾ ਹੁੰਗਾਰਾ ਬਹੁਤ ਤਸੱਲੀਬਖਸ਼ ਰਿਹਾ।